5.02.2010

أوراقــ لابـــد أنــ نمــزقـــ هـ ــا

حياة كل واحد فينا فعلا عاملة زى الكتاب اللى جواه صفحات و صفحات .. و بيحكمها عمر كل واحد فينا .. و بيتكتب فيها
بايدينا حاجات كتيرة .. ذكرياتنا .. مشاكلنا .. افراحنا .. احزاننا .. حياتنا بوجه عام !!
كل صفحة ممكن تكون يوم من عمرك .. او فترة .. او عمر بحاله جوا عمرك مش يتنسى ,, بس فكرت قبل كدا تقطع 
يوم من ايام حياتك .. او فترة من فترات عمرك .. او ورقة من اوراق حياتك ؟؟!
و هو دا موضوعنا عن الاوراق اللى لازم تتقطع من حياتنا .. ايه هى ؟؟!

اول ورقة .. تضحية نتيجتها الغدر !!

 " لما نضحى بكل م فينا و نحرق كمان اعصابنا و من دمنا الغالى و بانشغال فكرنا و بالنا و حياتنا عشان ناس فى حياتنا و نحرم على نفسنا قولة " اااااه " من دا كله و نحرم نفسنا و قولبنا من الفرحة عشانهم و فى الاخر مش نلقى منهم غير الجحود و التأنيب كمان .. و منتهى التبلد فى الاحساس و هما بيقولولنا : مش ضربتك على ايدك عشان تعمل كدا معايا ؟؟ حاجة تزعل اوى .. مش كدا ؟؟
و يبقى مع كدا كمان الخداع و التخلى عننا وقت ما نحتاج لهم .. و ينقصك فى نظره بدون اى مبررات لمجرد انه شايف كدا عزة لنفسه و يدوس على كل حاجة بينك و بينهم !!
ورقة زى دى لازم تنقطع بكل ما فيها من حقيقة و احداث .. بكل ما فيها من اّلام و مش نخرج منها غير بعزة نفسنا و بس و كل البعد عن اللى بالشكل ده

تانى ورقة .. قريبين و لكن ... !!

" ناس قريبة مننا فعلا .. شئنا أم ابينا هما قريبين مننا .. و احنا بمنتهى الاخلاص نقدم لهم كل الخير و نكون اصحاب المواقف معاهم .. بس فى النهاية احنا نكون معدومين من كل شئ عشانهم !!
هما قريبين لينا .. بس اغراب علينا رغم اننا نقف جنبهم فى مصايبهم و مشاكلهم عشان ده الواجب علينا !!
قريبين بس مش يحبوا لك الخير ابدا .. يتمنوه لغيرك ولا ان الخير يوصلك ابدا !!
ورقة زى دى لازم تنقطع بكل ما فيها من حقيقة و احداث .. بكل ما فيها من اّلام و مش نخرج منها غير بعزة نفسنا و بس و كل البعد عن اللى بالشكل ده ..!! "

تالت ورقة .. أخيــار على طول الخط !!

" سبحان الله .. فيه ناس مش يستحقوا الطيبة و الخير من الواحد .. و مع ذلك بنقنع نفسنا بانهم هايقدروا اللى بنعمله ده و نفضل نصبر نفسنا .. بكره هايفهموا .. بكره هايفهموا !! و برضه مفيش نتيجة لدا كله 
مش بنستنى منهم فلوس .. او عطاء بالاجبار .. كل المطلوب " لمسة احساس " هاتخلينا اكبر من الدنيا و ما فيها من فرحة قلوبنا .. لاننا اخيار معاهم طول الوقت و بندى الخير و بنتمناه لهم على طول الخط .. 
فياترى بنلاقى منهم كدا دايما ..!!
ورقة زى دى لازم تنقطع بكل ما فيها من حقيقة و احداث .. بكل ما فيها من اّلام و مش نخرج منها غير بعزة نفسنا و بس و كل البعد عن اللى بالشكل ده "

كدا انتهى موضوعنا .. و كل اللى حبيت اوضحه فيه انواع من الناس موجودة فينا .. مضحون ,, اصدقاء ,, خيرون !!
كلهم نوعيات جميلة جدا جدا من البشر .. لكن فيه انواع بتلقاهم صعبة اوى اوى من البشر ,, و اللى بيكتب بينهم ورقة فى حياتنا و لازم تنطقع مادام حصل فيها اللى قولته ده .. حفاظا على نفسنا من الانهيار و حفاظا على كرامتنا و حفاظا على صورة ذكرياتنا كمان

3 comments:

  1. السلام عليكم يا محمد
    شوف بالرغم ان الكرامه فوق اى تنازل بس احيانا بتكون نظرتنا الانفعاليه- زى ما انا شايفه فى كلامك كدا- بتكبر الامور ولو رجعنا لهدوئنا يمكن النظره تتغير

    وغالبا بيكون فى امور واضحه(ثغرات) فى الشخصيات اللى هى- قريبه- اصدقاءنا-
    زملاءنا- بس احنا الى ما كنا منتبهين ليها ومعنى اننا ما شفنهاش يبقى اكيد كانت فى امور احسن منهم علشان كدا ما شفنا الجوانب اللى بتظهر بعدين سيئه فيهم

    احيانا الحياه بتفرض علينا امور يمكن صعب نفسرها للاشخاص المحيطين بينا بس لازم فى المقابل نتعامل معاهم بما يليق بمكانتهم عندنا وان لم نفسر كل شئ
    فربما افعالنا مستقبلا تفسر ذلك
    يعنى ضع غيرك مكانك تمام

    وكان فى مقوله جميله فعلا اننا احيانا لا نحتاج لقلب الصفحه بل تمزيقها
    بس هضيف عليها
    بتأنى وتمهل حتى لا نخسر اشخاص مهمه للابد

    التمس الاعذار يا محمد مادامت لا تهينك الافعال
    وان شاء الله القادم يكون خير لك دايما

    اختك
    بسنت

    ReplyDelete
  2. when it comes to football, Beckham is of course the best player that i know* good friday 2019 images

    ReplyDelete
  3. Hi there! I just want to give a huge thumbs up for the nice information you’ve here on this post. I will probably be coming again to your weblog for extra soon. Easter Drawings

    ReplyDelete